Moti Muktak, Janbhasha ke

Pustak Parichay

'Moti Muktak, Janbhasha ke ek vishesh pustak ke roop mein kul char bhagon mein vibhajit hai jo vividh vishayon per 228 vishisht dohon, 208 chhitput chhoti rachnaon, 54 anya ananddayini kavitaon evam kul 19 rochak kahaniyon/ laghu kathaon ka sammishran hai. Yah lekhak ka aathvan Kavya Sangrah bhi hai. Yah padhne mein sirf ananddayak aur rochak hi nahin, apitu behad gyanvardhak bhi hai. Dharm, adhyatm, tyohar, rashtrabodh, prakriti, rajniti tatha anek manviya bhavnaon ko rekhankit karte dohe evam anya muktak inmen shamil hain. Prem, asha, utsah, shaurya, karuda, vatsalya, hasya evam adhyatm se ot-prot ye kavitaen evam kahaniyan manav jivan ki ek nai vyakhya prastut karti hain. Bhav pravanta evam sahaj sampreshaniyata ki vishishtata se vibhushit tatha jindagi ke tamam anubhavon se bhigi hui ye kavitaen evam kahaniyan aapko barbas apni or aakrisht karti hain.

Sarvvidhit hai ki dohe swabhavtah gagar mein sagar hote hain. Sath hi pustak mein maujud anya chhoti rachnaon ko padhne ke bad sambhav hai aap swatah hi kah uthen ki 'dekhan mein chhote lagen, bhav bhare gambhir'. Anya kavitaen evam kahaniyan bhi vishva kalyankari bhavnaon se ot-prot hain. Yatra-tatra bikhre dohon aur vishesh kar anya chhoti rachnaon ko bator kar ektra karna nissandeh samay sadhya karya raha hai, kintu kasht sadhya kattai nahin.

-Rajendra Prasad Gupta, Lekhak.